Péyi la an boulves
On manman boulves
Davwa
Léta fwansé zawa
Dépi on pakèt lanné
Kon zannanna sovaj
Ka sousé
Lèt peyi Gwiyann
Kon grenn papay
Pèp la sanblé
Pou di NOU GON kE SA
Alos on fanm grangrèk
Ka maché douvan-dèyè kon krab
vini
Pou étenn difé la
I konpwann padavwa i sòti adan on pèyi
Ka sanm
TAN NOU
Ta ZÒT
anba jouk a lépwofitan
I té pé simé
Pawol a landòmi
Pawol a vèglaj
Soukré on sak chabon
plen lajan AN POUD
pawol an bouch …pa chaj
sanblé tètkolé té ja konpwann
sété on moun voyé
voyé pou étenn douvanjou plis jistis
étenn soley
an zyé a ti moun ki pa ka-y lékòl
a moun ka bwè dlo anpwazoné
étenn soley
ki té vlé limé an kè
a pèp natif-natal pèyi Gwiyann
a désandan nèg ki mawon an tan lèsklavaj
léta zawa
ozabwa
menm jan chyen pwi adan on nich gèp
padavwa
fizé a-y pé pa monté jis owa lalin
i ka pèd lajan
mété-y
a dépalé dépalé
malpalé pèp Gwiyann
ki GON kE SA
Twop tan zozyo rapas ka pitité
An péyi a yo
Jòdijou apa détisou yo ka mandé
Yo pa alamandisité
